Новинарката Керол Ченг, за The Balkans, списание кое излегува на Тајван и третира актуелни теми од Балканот, во најновиот број објави интервју со Неговото Блаженство Архиепископот Охридски и Митрополит скопски г.г. Јован.
- 捉放是神的旨意嗎?還是撒旦的作為?
-Дали вашето неодамнешно ослободување од затвор го сметате за Божја волја или можеби за некакво случајно собитие?
Одговор: Долги години наназад се трудам да ја спроведувам Божјата волја. Колку во тоа успевам најдобро знае самиот Бог, но јас немам впечаток дека со некоја моја постапка намерно се спротиставувам на волјата Божја. Така, и мојата молитва во затворот не беше Господ да ми даде по секоја цена слобода, туку да бидам на слобода само ако му е тоа угодно на Бога. Па затоа верувам дека кога навистина Господ сметаше оти е најблагополучно, тогаш тој помогна да бидам на слобода.
- 在牢裡,早上起來第一個念頭是什麼?
- Додека престојувавте во заточение, со која мисла најчесто се будевте секое утро?
Одговор: Гледам дека сакате да направите невообичаено и би го нарекол многу личносно интервју. Немам против и ќе ви одговорам. Се будев со помислата дали се добро и како го доживуваат моето отсуство оние што ги оставив надвор од затворските решетики. Како се Епископите и свештенослужителите за кои знаев дека не можат мирно да спијат додека не ме ослободат од затворот. Како се монасите и монахињите за кои бев убеден дека не само што страдаат заради моето отсуство, туку страдаат и за најнеопходните продукти за живот: храна, облека и други секојдневни потреби. Но, неизоставно ми доаѓаше помислата и за секој од членовите на нашата Црква за кои се молев Господ да им ја утврди верата која беше поставена пред искушение. Од друга страна, нивната постојаност и решеност да истраат пред гонењата мене ми даваше сила во затворот. Токму во таквите содејства е убавината на соборниот живот во Црквата.
- 請你簡單說說牢裡的日子?牢裡如何靈修?有聖經可以看嗎?哪一句聖經裡的話特別對你有幫助?
- Дали би можеле накусо да ни го претставите секојдневниот живот во затворот? Како во заточение може да се одвива духовниот живот? Дали ви беше дозволено да го читате Светото Писмо? Кое изречение од Светото Писмо најмногу ви има помогнато?
Одговор: За жал, во затворите во Република Македонија отсуствува дури и најелементарниот поредок, а следствено на тоа нема никаква ресоцијализација на затворениците. Политичкиот хаос во кој живее земјата се рефлектира и на безпоредокот во затворот. За таквиот беспоредок веројатно допринесува уште и слабата финансиска поткрепа на затворите. Кога за затворениците не можете да обезбедите она што им е најнеопходно: храна и средства за хигиена, а да не говориме за облека, постелнина или прибор за јадење, тогаш јасно ви е дека таму не може и да се воспостави поредок. Во Идризово, во затворот каде што бев јас, им се дозволуваше на затворениците да носат храна од дома, зашто поинаку се плашеа дека во затворот ќе има бунт заради недостаток на храна. Секако дека им се дозволуваше од дома да донесуваат облека, постелнина, па дури и прибор за јадење: чинја, лажица и вилушка, зашто затворот немаше финансиски капацитет да го набави дури ниту тоа за затворениците. Е во такви услови, каков поредок може да се наметне? Во таква хаотична состојба да говориш за квалитет на духовен живот е беспредметно. Во состојба кога времето за молитва, за тихување, за читање треба да го украдеш од беспоредокот, навистина е тешко да се говори за духовен живот. Но, фала му на Бога, тоа е сега минато, ама ги жалам оние што останаа во затворот, а особено оние со високи затворски казни, зашто за нив не е казна само тоа што се затворени, туку уште поголема казна што живеат во таков беспоредок.
-你有不解神的旨意是什麼的時候嗎?在牢裡的心情是喜樂?鬱悶?時喜時憂?
- Дали имавте мигови кога се сомневавте во Божјата волја? Во заточение може ли да се има радосен дух, или можеби потиштеноста преовладува; или, пак, овие две состојби наизменично доаѓаат и си одат?
Одговор: Човекот е слабо и кршливо битие. Кога апостол Павле за себе вели дека ослабел, како и секој човек, тоа уште повеќе важи за мене. Но, Господ ја знае границата на нашата слабост и доаѓа да нè освежи токму кога ни е најпотребно. Секако дека во заточение може да се има радосен дух зашто духот всушност и никогаш неможе да биде заточен. Особено ако човек живеее во Духот Божји. Духот дише каде што сака. (Јн. 3,8) Тој е слободен. Така и затвореникот кој го има Духот Божји во затвор е само физички. Неговиот дух е слободен. Но, секако дека радоста и тагата го пратат секој човек. Дури и најдуховните луѓе живеат во состојба на една радосна тага, само што во таквата состојба не може да се направи строга поделба меѓу радоста и тагата, туку тие некако сожителствуваат. Тагата се заквасува со радост, за да не е неподносливо горка, но и радоста никогаш не оди без тага, за да не се заборави дека во овој свет сепак има смрт.
- 你是人,必然有軟弱的時候,怎麼辦?
- Како и секој човек, така и вие сигурно сте доживеале мигови на слабост. Како се имате справувано со нив?
Одговор: Кога дува силен ветер најдобро е да се подзаскриеш. Кога надоаѓа цунами, најдобро е ако има можност да се поместиш од зоната на неговото дејство. Многу слично е и со слабоста. Кога надоаѓаат моменти на слабост најдобро е да го применуваш она за кое си се вежбал да го практикуваш во такви ситуации, а тоа е трпението. Трпението е лек за сите непријатни ситуации во кои може да се западне. Токму затоа тоа се вместува со највисоките добродетели.
- 用什麼話來鼓勵你的同事?
- Со какви зборови обично ви доаѓало да ги охрабрувате вашите созаточеници?
Одговор: Најчесто со зборовите со кои и сам се охрабрував, а тоа се зборовите на апостолот Павле: „Се фалиме со маките, знаејќи дека од маката се раѓа трпението, од трпението – искуството, а од искуството – надежта.
Надежта, пак, не посрамува, зашто љубовта Божја се излеа во нашите срца преку Духот Свети” (Рим. 5, 3-5).
- 用什麼訊息鼓勵的教友?
- Со кои пораки, пак, вообичаено ги охрабрувавте верниците надвор?
Одговор: Ним исто така им говорев од зборовите на апостолот Павле: „Сигурен сум дека ни смртта, ни животот, ни ангелите ниту некои други небесни сили, ниту сегашноста, ниту иднината, ниту нешто друго на небото или во адот, ниту некоја друга твар, би можеле да нè разделат од љубовта Божја кон нас, како што таа се објави во личноста на Исуса Христа нашиот Господ“ (Рим. 8,31–39).
- 對把你放進牢裡的人,我知道你不恨他們,但你有恨與原諒的衝突嗎?
- Во однос на оние што ве ставија во затвор, јас разбирам дека не ги мразите, но дали сте почувствувале двоумење помеѓу омраза и простување?
Одговор: Со ова прашање ми влеговте најдлабоко во внатрешниот човек и во внатрешната борба која ја имав во затворот. Всушност, секоја друга борба во затворот беше полесна од борбата не само да не се мразат оние што на правда Божја ме затворија неправедно, туку и да им се прости за злосторството и неделата што ги направија, не само кон мене, туку и кон целата Црква Божја. И ако сега треба со еден збор да кажам дали победив во таа битка, скромно и со смирение ќе одговорам дека незнам, но веројатно сеуште не во потполност. Час ќе помислев дека е готово и дека не само што не ги мразам моите гонители и поробувачи туку дури и им простувам. Ќе бидам лицемер ако ви речам дека стигнав до такво духовно рамниште и безрезервно да ги љубам. Но, штом ќе се успокоев од искушението, тоа по некое време повторно се навраќаше. Можеби затоа што сеуште бев во затвор и под тоа бреме требаше да се победува таквото искушение. Сега, кога веќе сум на слобода како да сум поспокоен и како да ја немам таа горчина која ја раѓа злопамтењето. Но, знам дека тоа ќе биде борба уште за долго. Господ само да ми биде на помош да не потклекнам, зашто без таа победа сето неправедно страдање кое го претрпев ќе биде залудно.
- 你入牢的「志業」尚未完成,要繼續回馬其頓「奮鬥」嗎?
- Црковните состојби поради кои бевте затворани сеуште не се разрешени; дали сте со намера да се вратите во Македонија да се потрудите за нивно разрешување?
Одговор: Секако, Република Македонија е место за мене од Бога одредено каде да ја извршувам својата пастирска служба. Едвај чекам после овој период на здравствено опоравување во Русија, да се вратам на местото на мојата пастирска служба. Таму треба уште многу работа за да се постигне целосно единството на Црквата, но дури и кога со Божја помош ќе се постигне од нас посакуваното единство ќе има нов предизвик на службата, а тоа е словесната служба меѓу народот во Р. Македонија која нажалост во оваа наша современост многу недостасува.
- 出獄有什麼條件?
- Дали вашето ослободување од затвор подразбираше одредени услови?
Одговор: Не. Моето ослободување од затвор можеше да случи пред повеќе од една година и шест месеци. Но, тогаш се бараше исполнување на одредени услови од моја страна, имено да се согласам по ослободувањето да ја напуштам Република Македонија и повеќе да не се враќам. Како што е познато, јас под такви услови не се согласив да бидам ослобден и останав во затвор. Сегашново ослободување е без било какви услови, зашто кога би ми биле поставени некакви услови секако дека повторно ќе го одбиев таквото ослободување. Ако се согласев на ослободување под било кои услови, всушност ќе го порекнев тоа што многукратно се покажа и докажа, дека моето затворање всушност беше со политичка цел, да биде цена за пазарења за признавање на автокефалноста на МПЦ. На тоа едноставно неможев да се согласам заради моите верски и црковни убедувања, без оглед на тоа која цена требаше да ја платам.
- 東正教大家庭的主教們,對你今後的工作有什麼計劃?對你的態度有什麼建議?
- Какви се плановите за вашата дејност во рамките на големото православно семејство? Кои се обично советите што ги добивате во врска со вашата дејност?
Одговор: Моите планови секогаш се врзувале за исполнување на волјата Божја. Така и сега по излегувањето од затвор, а можам да речам дури уште понагласено. Расколот во Црквата пред сè е рана на телото Христово, па затоа тој е всушност болка што ја трпи самиот Христос. Но, таа болка треба да да ја чувсвуваат и сите воцрковени личности, а особено Епископите на Црквата. Нивната служба и должност всушност е да се грижат за единството на Црквата. И затоа сметам дека е многу добро што прашањето за расколот на Црквата во Р. Македонија го заинтересира веќе целиот православен свет. Скоро да нема човек меѓу православните христијани, што не чул за гонењата и затварањата што ги претрпува еден Архиепископ во Република Македонија, а само затоа што се бори за единство на Црквата. Така, на несакање, преку гонењата што ги спроведоа, властите во Р. Македонија всушност ѝ направија и голема услуга на канонската Црква. Вистината да се дознае од исток до запад и од север до југ.
- 如果你的態度不變,政府勢必還會想辦法抓你不是?
- Доколку опстоите на своите ставови, дали постои опасност властите повторно да се обидат да најдат начин да ве затворат?
Одговор: Доколку упорно се одлучат да работаат на своја штета, како што за жал до скоро беа одлучни да работаат, тогаш секако да. Но, да се надеваме дека ќе се вразумат, а ако не го направат тоа сами, тогаш Господ ќе најде свој метод да ги вразуми, слично како што вразумил многу властодршци во минатото.
- 為神到俄羅斯?不回馬其頓啦?
- После величествениот дочек во Русија какви планови имате?
Одговор: Во Русија навистина имаме достоинствен дочек. Пред сè ни беше овозможено да направиме детален преглед на здравствената состојба. Се покажа дека затворот допринел да се јават многу здравствени проблеми, но за среќа не од неизлечива природа. Така, половината од мојот планиран престој во Русија всушност се потроши на медицински испитувања и здравствени лекувања. Но, последново време веќе го ползувам да се поклонам на многуте светињи низ Русија, да служам и да се помолам. Посетив значајни манастири и места во северозападниот дел на Русија, а ако даде Бог се надевам дека ќе имам можност да ги посетам и светињите во Москва. Но, секако срцето и мислите постојано ме влечат кон местото на мојата од Бога дарувана служба, а тоа е пред се во Република Македонија. Така, по мајскиот Архијерејски Собор во Белград се надевам дека ќе бидам покрај Епископите, свештениците, монасите и верниот народ во Република Македонија.